الخروجة
إمبارح عملت كل الأكل و حلويات و عصاير لحد ما حسيت إني أحسن حاجة إني أعزم أي حد عشان الحاجت دي تخلص .. طيب الوقت الباقي أعمل فيه إيه ؟!! جلست علي الكنبة في الليفنيج – غرفة المعيشة سابقا أيام أمل تلعب بالكرة – و بحلقت في صوابع قدمي . إستمريت في (البحلقة ) قرابه النصف ساعه لدرجة أنه خيل إلي أنها زادت إصبعا. حتعملي إيه يا بت يا لولو في الكام ساعه الفاضيين ؟ يقطع النشاط علي اللي عاوز يمارسه ... عيناي مفتوحتان علي اتساعهما يمارسان كل انواع الأرق المعروف ويلعبان لعبه دنيئة يخدعان بها عقلي حتي موعد حضور الأولاد ليتغير الوضع من Pause إلي Sleep أو Shutdown حسب حالة الجهاز في ذلك الوقت .. و بعديييين ؟؟؟ ممكن أن يتغير الوضع إذا مارست حالة جديدة من تغيير المزاج .. أخذ العربية و أروح أشرب عصير من أبو 50 جنيه للكوباية ده.. او حتي أجيب كاس العالم قصب من أبو 5 جنية مش مهم ... المهم التغيير إلبسي يا لولو و إتشيكي و لا كأنك رايحة فرح – دا حتي الفرح بينتهي قبل ما يبدأ لما العيال بيحدفوني بأي بلوة تبقع الفستان – و إنسي أنك رايحة تقعدي لوحدك ...